Starfið í fullum gangi...

Eftir nokkrar mannabreytingar er starfið nú komið á fullan skrið. Fullráðið er í allar stöður og nemendafjöldi liggur fyrir.
Nemendur sem hefja nám nú þetta haustið eru sex að tölu í yngri deild og fimm í þeirri eldri, auk fimm barna á leikskóla sem lúta faglegri stjórn þeirra Aldísar og Töru.
Olga og María leiða starfið sem umsjónarkennarar og er skólinn heppinn að njóta þekkingar þeirra og reynslu, að auki kennir Gísli Þór Briem íþróttir og sund auk smíði. Skólastjóri kennir einnig á eldra stigi. Anna Romanska sem ráðinn var matráður sér einnig um ræstingar og kennir heimilisfræði. Dilla verður áfram hjá okkur í vetur og mun sinna sérverkefnum og almennri ráðgjöf. Einvala lið starfsfólks og nemenda.
Eilítil breyting hefur verið gerð á stundatöflum eldri deildar, nemendur hafa fengið nýjar stundatöflur.
Skólabragur með mestu ágætum og reynum við að skapa hér andrúmsloft virðingar, jákvæðni og samstöðu.
Starfsdagur var síðasta föstudag þar sem starfsfólk fór til Húsavíkur að auka við þekkingu sína.
Síðasta fimmtudag fór allur skólinn að taka upp kartöflur, sem var kærkomin búbót fyrir mötuneyti skólans, nú síðan vita allir að eigin uppskera bragðast alla jafna best.
Þessa vikuna erum við að vinna í samstarfsverkefni við Rif rannsóknarstöð og erum með gestakennara frá þeim.  Því verkefni lýkur með strandhreinsun þar sem öllum er frjálst að mæta nk. laugardag. (https://www.facebook.com/events/2141631449434171/)

Upplýsingar um stundaskrár og skóladagatal er hægt að nálgast í flipanum "tilkynningar"

               góðar stundir      
                        Magnús skólastjóri