Grunnskólinn á Raufarhöfn

Gaman er að geta loksins sagt frá því að Krílabær, leikskólinn á Raufarhöfn, er fluttur inn í grunnskólahúsnæðið. Byggð var forstofubygging við grunnskólann (íþróttamiðstöðvar-megin) með fataklefum, snyrtingu fyrir leikskólann og ræstikompu sem var tengd leikskólarýminu sem er gamli "salur" grunnskólans. Því rými var breytt örlítið, settir upp veggir og útbúið hvíldarherbergi. Nýja aðstaðann fyrir leikskólann er því eins og best verður á kosið og eru starfsmenn, nemendur og foreldrar afar ánægðir  með útkomuna.

Skólamötuneytið - umbylting

Á sama tíma var skólamötuneyti skólans tekið í gegn og þar má með sanni segja að hafi verið algjör umbylting þar sem afar góð aðstaða er þar nú fyrir heimilisfræði og skólamötuneyti. Linda skólamatráður bauð okkur upp á lambalæri á fyrsta degi eftir breytingar og  bauð öllum upp á frostpinna á eftir.

Lokahátíð Stóru Upplestrarkeppninnar var haldin í félagsheimilinu Hnitbjörgu á Raufarhöfn 4. mars. Skólarnir sem koma að þessari lokahátíð eru grunnskólarnir á Bakkafirði, Þórshöfn, Svalbarði, Raufarhöfn og Öxarfjarðarskóli. Alls tóku átta nemendur úr 7. bekkjum skólanna þátt á lokahátíðinni og stóðu sig allir mjög vel. Þeir lásu brot úr skáldverki og ljóð, en að lokum völdu dómarar þrjá bestu upplesarana og veittu þeim verðlaun. Í fyrsta sæti varð Erla Salome Ólafsdóttir frá Grunnskólanum á Bakkafirði, annað sætið hlaut Marinó Úlfsson frá Svalbarðsskóla og þriðja sætið fékk Þórdís Sigtryggsdóttir nemandi í Grunnskólanum á Raufarhöfn. Nánari upplýsingar um keppnina er að finna á slóðinni http://www.hafnarfjordur.is/upplestur/

Hér eru myndir frá lokahátíðinni... og...

...hér eru fleiri myndir frá lokahátíðinni...

Nýverið kom Jóhann Breiðfjörð starfsmaður Nýsköpunar og sjálfmenntaður tæknilegóhönnuður í heimsókn til okkar í skólann og hélt námskeið fyrir nemendur. Hann var með tvö námskeið, annað fyrir skólahópinn á leikskólanum og 1. - 3. bekk og hitt fyrir 4. - 6. bekk. Krakkarnir voru mjög ánægðir með þessa nýbreytni í skólanum og vonandi kemur Jóhann aftur í heimsókn til okkar seinna. Þess má til gamans geta að þegar Jóhann var aðeins 16 ára gamall bankaði hann upp á hjá forstjóra Legó í Danmörku með vélmenni sem hann hafði gert og í framhaldi af því var hann ráðinn til starfa hjá fyrirtækinu sem hönnuður, hugmyndasmiður og ráðgjafi.

Hér eru myndir frá námskeiðinu.