Saga skólans

Brot úr sögu skólahalds á Raufarhöfn

„Með því að nefndin (fræðslunefnd Presthólahrepps) sér fram á örðugleika við að halda farskóla í héraðinu á komandi vetri, tjáir fundurinn sig samþykkan því að farskólanum verði fresta til haustsins 1910“

Tillaga þessi var samþykkt einum rómi á fundi fræðslunefndar í október 1907 og er ein fyrsta heimild um skólahald í Presthólahreppi. Farskóli var rekinn samfellt frá 1910-1927. Hólmsteinn Helgason og Guðmundur Eiríksson voru farkennarar og kenndu þeir á bæjunum Rifi, Grjótnesi, Ásmundarstöðum, Ormarslóni og Grasgeira. 

Á Raufarhöfn var farkennsla frá 1927-1929, Guðmundur Eiríksson kenndi þar í Græna húsinu. Barnaskóli Raufarhafnar var stofnaður 1930. Guðmundur Eiríksson frá Grasgeira í Presthólahreppi, varð fyrsti skólastjóri barnaskólans 1933. Skólinn var til húsa í Hreppshúsi.

Leifur Eiríksson frá Harðbak í Presthólahreppi, hóf upp á sitt einsdæmi ungmennafræðusli á Raufarhöfn haustið 1933. Nemendur frá 12 ára aldri, sem ekki höfðu átt kost á meiri fræðslu eftir barnaskóla og áhuga höfðu, voru í námi hjá honum 4-5 mánuði á ári. Þessi skóli fékk styrki úr ríkissjóði og sýslusjóði og þróaðist í það að verða viðurkenndur unglingaskóli Raufarhafnar. Þrátt fyrir þröngan kost og hrakningar var Leifur skólastjóri þessa skóla til ársins 1946. Þáttaskil urðu þegar barnaskólahús var byggt 1938 undir Klifinu. 

Barnaskóli Raufarhafnar og unglingaskóli Raufarhafnar voru síðan sameinaðir haustið 1946 og varð Guðmundur Eiríksson fyrsti skólastjóri barna og unglingaskóla Raufarhafnar og samfellt í 35 ár, en Leifur Eiríksson varð kennari til ársins 1952.

Núverandi skólahús er staðsett sunnan við Kottjörnina við Skólabraut. Það var tekið í notkun 3. nóvember 1964. 

Tónlistarskóli Raufarhafnar var stofnaður 1947 af sveitarfélaginu og þá staðsettur í grunnskólanum. Við sama svæði var sundlaug tekin í notkun 1984 og síðast íþróttahús 1995. Þar er á einum og sama staðnum mjög glæsileg skóla, íþrótta- og tómstundaaðstaða sem er til fyrirmyndar. Skammt þaðan er íþróttasvæði, grasvöllur í fullri stærð og 400 m malarhlaupabraut þar umhverfis.

Upplýsingarnar að ofan eru fengnar úr ritgerðinni „Raufarhöfn“ eftir Ágústu Valdísi Svansdóttur. Örfáum atriðum var breytt frá því sem var í ritgerðinni vegna breyttra aðstæðna.