Fimmtudaginn 11. apríl kom unglingadeild Grunnskólans á Þórshöfn í heimsókn. Með þeim voru krakkar frá Bakkafirði, Eistlandi og Lettlandi en þau eru öll í samstarfi við Nordplus og heimsækja heimabæ hvors annars. Það var einstaklega gaman að fá þau í heimsókn, við buðum þeim að sjá Heimskautsgerðið okkar og fórum með þau út að vita. Þau voru búin að skipuleggja leiki í íþróttahúsinu og eftir miðdegiskaffið fórum við flest í sund. Við hjálpuðumst að við að elda kvöldmat en í boði var hefðbundinn eistneskur matur. Yfir daginn voru nemendur búnir að vera að taka upp myndband sem var svo sýnt um kvöldið. Það vakti mikla lukku. Nemendurnir gistu svo allir í skólanum. Á föstudeginum fórum við svo samam í Ásbyrgi og fórum í göngutúr um svæðið með þjóðgarðsvörðunum. Þetta var einstaklega skemmtilegt og vorum við svo heppin að fá fallegt veður og því gátu allir notið sín vel á svæðinu. Dagurinn var ekki búinn því eftir Ásbyrgi fórum við á Skjálftrasetrið á Kópaskeri og skoðuðum okkur um. Kvöldið endaði síðan á samskólaballi á Þórshöfn sem var svo skemmtilegt að nemendur geta ekki beðið eftir að fá að halda annað ball, eins og þau orðuðu það, sem fyrst.
Athugasemdir