Allt

Skákdagurinn var haldinn í dag þann 26. janúar, en dagurinn er afmælisdagur Friðriks Ólafssonar sem er fyrsti stórmeistari okkar Íslendinga í skák. Nemendur í 1.-3. bekk fengu Snorra Sturluson í heimsókn til sín en Snorri er annálaður skákáhugamaður og kenndi krökkunum mannganginn. Krakkarnir á efri hæðinni voru svo hvattir til þess að tefla í frímínútum og nýttu þau tækifærið óspart.

Föstudagurinn 20. janúar, sjálfur bóndadagurinn, var ansi furðulegur hjá okkur í Grunnskóla Raufarhafnar. Nemendur höfðu fengið skilaboð um að skilja kæfusamlokuna eftir heima og þess í stað bökuðu krakkarnir pítsu í heimilisfræði tímum hjá hinni elskuleg Þóru Soffíu. Eftir góða máltíð var svo ekki haldið aftur upp í kennslustofurnar heldur var slegið upp gríðarskemmtilegri keppni. Keppt var í ýmsum furðulegum íþróttagreinum eins og trukkadrætti, eggjahlaupi, diskakasti, skutlukasti og naglalakkskeppni. Eftir það héldu allir sáttir heim til sín í helgarfrí. Takk fyrir daginn krakkar!

Mánudaginn 28. nóvember hélt 4. – 7. bekkur dillidag ásamt foreldrum og kennara. Hópurinn kom saman í skólanum klukkan 18:00 og spilaði. Þegar allir voru mættir tók við jólaföndur sem að þessu sinni fólst í því að mála á ónýtar ljósaperur. Eftir þessa listsköpun voru allir orðnir svangir og tóku vel til matar síns. Allir höfðu komið með veitingar sem settar voru saman á hlaðborð og svignuðu borðin undan kræsingunum. Því næst var spilað aðeins meira og hefðu sumir verið til í að spila áfram fram á nótt en dillidegi lauk svo um kl. 21:00. Olga umsjónarkennari og Birna og Bryndís, bekkjarfulltrúar þakka nemendum og foreldrum fyrir ánægjulega samverustund.

Krakkarnir í 1.-3. bekk hittust ásamt foreldrum og Heiðu kennara á Dillidegi föstudaginn 25. nóvember. Þau útbjuggu fallegt jólaskraut úr trölladeigi og brögðuðu á gómsætum veitingum.

Föstudaginn 4. nóvember var hrekkjavökuþema í félagsmiðstöðinni Blik. Nemendurnir mættu í sínum hræðilegustu búningum og dönsuðu og öskruðu.

Nemendur á öllum aldri hafa kynnt sér mexíkóska matarmenningu í heimilisfræðitímum hjá Þóru. Í síðasta tíma í dag komum við svo öll saman niðri í mötuneyti þar sem nemendur kynntu þá rétti sem þau höfðu gert og sögðu frá því sem þau vissu um Mexíkó. Salurinn var skemmtilega skreyttur af krökkunum og toppnum var svo náð þegar allir fengu sér að borða. Sannarlega góður endir á góðri skólaviku.

K-keppnin var haldin í félagsmiðstöðinni í lok september. Enginn hafði hugmynd um hvað K-keppnin er, enda aldrei verið keppt í henni áður. Krakkarnir kepptu í hinum ýmsu "íþróttagreinum" sem byrja á K og fengu stig eftir því hvernig þeim gekk. Sá sem fékk flest stig var svo útnefndur K-meistarinn. Að sjálfsögðu var keppt í tveimur flokkum, Kasper Jan vann hjá yngri og Einar Hafsteinn hjá eldri.

Föstudaginn 2. september hlupu nemendur skólans Norræna skólahlaupið. Hægt var að velja á milli þriggja vegalengda, 2.5 km, 5 km og 10 km. Allir tóku þátt og luku hlaupinu þrátt fyrir að veðrið hafi ekki verið ákjósanlegt. Friðrik Þór var manna duglegastur í hlaupinu en hann hljóp 5 km.